"Manchester Yunayted" futbolchisi Amad Diallo yangi murabbiy Maykl Kerrik qo‘l ostida jamoaning kayfiyati yaxshilangani haqida gapirdi.

"Qizil iblislar" yangi murabbiy bilan ilk 3 ta o‘yinda uchta g‘alabaga erishdi. Avvaliga "Manchester Siti" (2:0) va "Arsenal" (3:2) mag‘lubiyatga uchratilgan bo‘lsa, kecha "Fulxem" (3:2) ham taslim etildi.

"Murabbiy doim biz buyuk klubda o‘ynayotganimizni va Chempionlar ligasiga chiqmoqchi bo‘lsak, eng yuqori darajani ushlab turishimiz shartligini aytadi. Har bir o‘yinda g‘alaba qozonishimiz kerak - bu safar ham biz bunga qodir ekanligimizni isbotladik. Biz holatimizdan juda mamnunmiz, qadam-baqadam oldinga siljishimiz kerak. Oldinda hali ko‘plab o‘yinlar bor, har narsa bo‘lishi mumkin, ammo bizda yaxshi kayfiyat va jangovar ruh bor," - dedi Diallo yakshanba kungi o‘yindan so‘ng.

"MYU" Premyer-liga 24-turidan keyin turnir jadvalida to‘rtinchi o‘rinda bormoqda.