Italiya terma jamoasi va "Roma" klubi himoyachisi Janluka Manchini burnidan olgan jarohati sababli jarrohlik amaliyotini o‘tadi. Bu haqda Onefootball nashri xabar bermoqda.

Futbolchi 2 fevral kuni "Udineze"ga qarshi kechgan bahsning birinchi bo‘limida shikastlangan edi, biroq maydonni tark etmay, o‘yinni oxirigacha yetkazib qo‘ygan. Operasiyadan so‘ng Manchini ma’lum muddat davomida maxsus himoya niqobida o‘ynashiga to‘g‘ri keladi. Hozirda uning jamoasi 23 o‘yindan so‘ng 43 ochko bilan turnir jadvalida beshinchi o‘rinda bormoqda.

Joriy mavsumda 29 yoshli futbolchi 30 ta o‘yinda ishtirok etib, 1 ta gol va 1 ta golli uzatmani amalga oshirdi. Shuningdek, uning hisobida 9 ta sariq va 1 ta qizil kartochka bor. Transfermarkt portali Manchinining bozor qiymatini 15 million yevroga baholagan.