Италия терма жамоаси ва "Рома" клуби ҳимоячиси Жанлука Манчини бурнидан олган жароҳати сабабли жарроҳлик амалиётини ўтади. Бу ҳақда Onefootball нашри хабар бермоқда.

Футболчи 2 февраль куни "Удинезе"га қарши кечган баҳснинг биринчи бўлимида шикастланган эди, бироқ майдонни тарк этмай, ўйинни охиригача етказиб қўйган. Операциядан сўнг Манчини маълум муддат давомида махсус ҳимоя ниқобида ўйнашига тўғри келади. Ҳозирда унинг жамоаси 23 ўйиндан сўнг 43 очко билан турнир жадвалида бешинчи ўринда бормоқда.

Жорий мавсумда 29 ёшли футболчи 30 та ўйинда иштирок этиб, 1 та гол ва 1 та голли узатмани амалга оширди. Шунингдек, унинг ҳисобида 9 та сариқ ва 1 та қизил карточка бор. Transfermarkt портали Манчинининг бозор қийматини 15 миллион еврога баҳолаган.