Xosep Gvardiola himoyachi Mark Gexining mart oyida «Arsenal»ga qarshi bo‘lib o‘tadigan Liga Kubogi finalida «Manchester Siti»ga yordam bera olishiga umid bildirgandi. Biroq, The Times nashrining xabar berishicha, Angliya Futbol ligasi Gvardiolaning iltimosiga qaramay, o‘z qoidalarini o‘zgartirmaydi.
Avvalroq Liga Kubogi qoidalariga o‘zgartirish kiritilgan edi. Unga ko‘ra, futbolchi bir mavsumning o‘zida ikkita klub safida ushbu turnirda ishtirok etishi mumkin, ammo buning uchun u klubda birinchi yarim final o‘yinigacha ro‘yxatdan o‘tgan bo‘lishi shart. Shu tariqa, Antuan Semenyodan farqli o‘laroq, Mark Gexi ushbu mavsumda «Manchester Siti» safida Liga Kubogida maydonga tusha olmaydi.
«Manchester Siti» va «Arsenal» o‘rtasidagi Liga Kubogi finali 22 mart kuni «Uembli» stadionida bo‘lib o‘tadi.
