Хосеп Гвардиола ҳимоячи Марк Гехининг март ойида «Арсенал»га қарши бўлиб ўтадиган Лига Кубоги финалида «Манчестер Сити»га ёрдам бера олишига умид билдирганди. Бироқ, The Times нашрининг хабар беришича, Англия Футбол лигаси Гвардиоланинг илтимосига қарамай, ўз қоидаларини ўзгартирмайди.
Аввалроқ Лига Кубоги қоидаларига ўзгартириш киритилган эди. Унга кўра, футболчи бир мавсумнинг ўзида иккита клуб сафида ушбу турнирда иштирок этиши мумкин, аммо бунинг учун у клубда биринчи ярим финал ўйинигача рўйхатдан ўтган бўлиши шарт. Шу тариқа, Антуан Семеньодан фарқли ўлароқ, Марк Гехи ушбу мавсумда «Манчестер Сити» сафида Лига Кубогида майдонга туша олмайди.
«Манчестер Сити» ва «Арсенал» ўртасидаги Лига Кубоги финали 22 март куни «Уэмбли» стадионида бўлиб ўтади.
