Belgiya terma jamoasi sobiq futbolchisi Eden Azar murabbiy Maurisio Sarri haqidagi xotiralari bilan o‘rtoqlashdi. Ular 2018/19 yilgi mavsumda «Chelsi»da birga faoliyat yuritishgan.

Azarning ta’kidlashicha, Sarri unga Krishtianu Ronaldudan o‘rnak olishni va xuddi u kabi hayot tarzini yuritishni maslahat bergan.

«Men buni istamaganman. Hech qachon haddimdan oshmaganman, lekin maydonda ham, uning tashqarisida ham doim Azar bo‘lib qolishni xohlaganman. Do‘stlarim meni kechki ovqatga taklif qilishsa — rozi bo‘lardim. Agar bir qadah vino ichkim kelsa — o‘zimni tiymasdim. Krishtianu bu — Krishtianu, men esa — menman», — deya Azarning so‘zlarini keltiradi Gazzetta dello Sport.

«Sarri bilan o‘rtamizda o‘ziga xos munosabatlar shakllangan. O‘ylaymanki, uning futbol haqidagi g‘oyalari menikiga juda yaqin. Vaqti-vaqti bilan uning mashg‘ulotlari zerikarli ekanini aytardim, lekin bu tanqid emasdi. Bundan tashqari, natijalar uning haq ekanligini isbotlardi».

Sarri qo‘l ostida London klubi Yevropa Ligasi g‘olibiga aylangan edi.