Бельгия терма жамоаси собиқ футболчиси Эден Азар мураббий Маурицио Сарри ҳақидаги хотиралари билан ўртоқлашди. Улар 2018/19 йилги мавсумда «Челси»да бирга фаолият юритишган.

Азарнинг таъкидлашича, Сарри унга Криштиану Роналдудан ўрнак олишни ва худди у каби ҳаёт тарзини юритишни маслаҳат берган.

«Мен буни истамаганман. Ҳеч қачон ҳаддимдан ошмаганман, лекин майдонда ҳам, унинг ташқарисида ҳам доим Азар бўлиб қолишни хоҳлаганман. Дўстларим мени кечки овқатга таклиф қилишса — рози бўлардим. Агар бир қадаҳ вино ичким келса — ўзимни тиймасдим. Криштиану бу — Криштиану, мен эса — менман», — дея Азарнинг сўзларини келтиради Gazzetta dello Sport.

«Сарри билан ўртамизда ўзига хос муносабатлар шаклланган. Ўйлайманки, унинг футбол ҳақидаги ғоялари меникига жуда яқин. Вақти-вақти билан унинг машғулотлари зерикарли эканини айтардим, лекин бу танқид эмасди. Бундан ташқари, натижалар унинг ҳақ эканлигини исботларди».

Сарри қўл остида Лондон клуби Европа Лигаси ғолибига айланган эди.