O‘zbekiston milliy terma jamoasi hamda Turkiyaning “Bashakshehir” klubi hujumchisi Eldor Shomurodov faoliyatini Istanbulning boshqa jamoasida davom ettirishi mumkin. Bu haqda Fotospor.com nashri xabar bermoqda.

Manbaga ko‘ra, Turkiya Superligasida chempionlik uchun kurash olib borayotgan “Fenerbahche” Shomurodovni transfer qilish masalasida “Bashakshehir” bilan muzokara o‘tkazgan. Istanbul klubi futbolchi bilan xayrlashishga qarshi emas, biroq Eldorning transferi uchun 20 million yevro talab qilmoqda.

“Bashakshehir” Shomurodov transferi uchun jami 5,7 million yevro sarflagan. Klub mavsum boshida futbolchini 3 million yevro evaziga “Roma”dan ijaraga olgan edi. 2026 yil fevral oyida shartnomadagi 2,7 million yevroga sotib olish bandi faollashtirilgan. Shuningdek, kelishuvga ko‘ra, futbolchining keyingi transferidan olinadigan foydaning 10 foizi “Roma”ga beriladi.

Ayni paytda “Fenerbahche” Turkiya chempionati turnir jadvalida 46 ochko bilan 2-pog‘onani egallab turibdi. Klub yetakchi “Galatasaroy”dan 3 ochkoga ortda qolmoqda. Sentyabr oyidan beri jamoani germaniyalik Domeniko Tedesko boshqarib keladi.

Ma’lumot uchun, Eldor Shomurodov 2025 yil yozidan buyon “Bashakshehir” safida to‘p surib kelmoqda. Hujumchi shu vaqtga qadar klub tarkibida 29 ta uchrashuvda maydonga tushib, 15 ta gol va 5 ta assist qayd etgan. Ayni paytda u Turkiya Superligasining eng yaxshi to‘purari bo‘lib, chempionat doirasida 14 ta gol va 4 ta assist muallifiga aylangan.