Italiyaning «Milan» klubi Jan-Filipp Matetaning transferi barbod bo‘lganidan so‘ng ingliz agentlaridan «qora belgi» oldi. Bu o‘tgan yilning yozida «Milan» xuddi shunday sabab bilan leverkuzenning «Bayer» klubi hujumchisi Viktor Bonifeysdan voz kechganidan keyingi ikkinchi holatdir.

Endilikda, The Touchline nashrining xabar berishicha, ingliz agentlari orasida norasmiy qoida tarqalmoqda: «Milan» bilan ish olib bormaslik kerak, chunki bu «vaqtni behuda sarflash» hisoblanadi. Bundan tashqari, bunday vaziyatlar futbolchining obro‘si va bozor qiymatiga salbiy ta’sir ko‘rsatishi mumkin. Zero, futbolchining surunkali kasalliklari haqidagi gap-so‘zlar, hatto ular asossiz bo‘lsa ham, uning qadrini oshirmasligi aniq.