Krishtianu Ronaldu Saudiya Arabistoni Suveren jamg‘armasi harakatlaridan noroziligini bildirib, «An-Nasr»ning ketma-ket ikkinchi o‘yinini boykot qilishga qaror qildi. Jamg‘arma Pro-liganing to‘rtta klubini boshqaradi va Ronalduning fikricha, mablag‘larning taqsimlanishi ochiqchasiga «Al-Hilol» foydasiga xizmat qilmoqda.
Al Nassr Zone nashrining «An-Nasr» klubi sobiq huquqiy direktori Saad al-Subaiga tayanib xabar berishicha, ayni damda Ronalduni boykotni to‘xtatishga ko‘ndirishga urinishlar bo‘lmoqda. Krishtianudan juma kungi bahsda hech bo‘lmaganda bir taym o‘ynash yoki eng kamida stadionda hozir bo‘lish so‘ralmoqda.
Krishtianu Ronalduning «An-Nasr» bilan shartnomasi 2027 yilning o‘rtalariga qadar mo‘ljallangan. Payshanba kuni portugaliyalik yulduz 41 yoshni qarshi oldi. 6 fevral kuni «An-Nasr» «Al-Ittihod»ga qarshi maydonga tushadi.
