«Barselona» bosh murabbiyi Xans-Diter Flik klubning transfer siyosati va bu boradagi ish tartibi haqida to‘xtalib o‘tdi. Nemis mutaxassisi yangi o‘yinchilarni tanlashda nafaqat sport mahorati, balki insoniy fazilatlarga ham e’tibor berilishini ta’kidladi.

«Yangi o‘yinchilar bilan shartnoma imzolash haqida gap ketganda, har bir qarorimiz maksimal darajada puxta o‘ylangan bo‘lishi kerak. Bu borada mening yonimda Dekudek ajoyib sherik bor, u bilan hamma narsani muhokama qilamiz. Qaror qabul qilishda doimo moliyaviy holat hisobga olinadi. Shuningdek, futbolchining qanday inson ekanligi va uning kelishi jamoaga qanday yordam berishi ham muhim ahamiyatga ega», – deya Flikning so‘zlarini keltirmoqda Barca Universal.

Qishki transfer oynasida Kataloniya grandi faqatgina bitta transfer bilan cheklandi: «ko‘k-anorranglilar» safini Saudiyaning «Al-Hilol» klubidan ijaraga olingan qanot himoyachisi Joau Kanselu to‘ldirdi.