«Барселона» бош мураббийи Ханс-Дитер Флик клубнинг трансфер сиёсати ва бу борадаги иш тартиби ҳақида тўхталиб ўтди. Немис мутахассиси янги ўйинчиларни танлашда нафақат спорт маҳорати, балки инсоний фазилатларга ҳам эътибор берилишини таъкидлади.

«Янги ўйинчилар билан шартнома имзолаш ҳақида гап кетганда, ҳар бир қароримиз максимал даражада пухта ўйланган бўлиши керак. Бу борада менинг ёнимда Декудек ажойиб шерик бор, у билан ҳамма нарсани муҳокама қиламиз. Қарор қабул қилишда доимо молиявий ҳолат ҳисобга олинади. Шунингдек, футболчининг қандай инсон эканлиги ва унинг келиши жамоага қандай ёрдам бериши ҳам муҳим аҳамиятга эга», – дея Фликнинг сўзларини келтирмоқда Barca Universal.

Қишки трансфер ойнасида Каталония гранди фақатгина битта трансфер билан чекланди: «кўк-анорранглилар» сафини Саудиянинг «Ал-Ҳилол» клубидан ижарага олинган қанот ҳимоячиси Жоау Канселу тўлдирди.