Marokash terma jamoasi bosh murabbiyi Valid Regragi o‘z lavozimida ishlashda davom etmoqda va u iste’foga chiqqani yo‘q. Bu haqda Marokash futbol federasiyasi rasmiy sayti xabar bermoqda.
Avvalroq bir qator mahalliy OAVlarda mutaxassisning ketishi haqida xabarlar tarqalgan edi. Uning qo‘l ostidagi jamoa yaqinda bo‘lib o‘tgan Afrika Millatlar Kubogi finalida Senegalga imkoniyatni boy berdi (0:1). Ko‘pchilikning yodida qolgan ushbu bahs senegalliklarning maydonni tark etishi va Braim Diasning penaltidan adashgani bilan bog‘liq voqealarga boy bo‘ldi.
Regragi 2022 yildan beri Marokash terma jamoasini boshqarib kelmoqda. Uning qo‘l ostida jamoa tayinlanganidan bir necha oy o‘tib boshlangan Jahon chempionatida to‘rtinchi o‘rinni egalladi. Shuningdek, Marokash JCH-2026 yo‘llanmasini ham qo‘lga kiritdi va u yerda Braziliya, Gaiti hamda Shotlandiya bilan bir guruhdan joy oldi.
