Марокаш терма жамоаси бош мураббийи Валид Реграги ўз лавозимида ишлашда давом этмоқда ва у истеъфога чиққани йўқ. Бу ҳақда Марокаш футбол федерацияси расмий сайти хабар бермоқда.
Аввалроқ бир қатор маҳаллий ОАВларда мутахассиснинг кетиши ҳақида хабарлар тарқалган эди. Унинг қўл остидаги жамоа яқинда бўлиб ўтган Африка Миллатлар Кубоги финалида Сенегалга имкониятни бой берди (0:1). Кўпчиликнинг ёдида қолган ушбу баҳс сенегалликларнинг майдонни тарк этиши ва Браим Диаснинг пенальтидан адашгани билан боғлиқ воқеаларга бой бўлди.
Реграги 2022 йилдан бери Марокаш терма жамоасини бошқариб келмоқда. Унинг қўл остида жамоа тайинланганидан бир неча ой ўтиб бошланган Жаҳон чемпионатида тўртинчи ўринни эгаллади. Шунингдек, Марокаш ЖЧ-2026 йўлланмасини ҳам қўлга киритди ва у ерда Бразилия, Гаити ҳамда Шотландия билан бир гуруҳдан жой олди.













