«Real» prezidenti Florentino Peres «Barselona» futbolchisini sotib olish va 2000 yilda Luish Figuning madridliklar lageriga o‘tishi bilan bog‘liq shov-shuvli voqeani takrorlashni istamoqda.

Bu haqda payshanba kuni birinchi bo‘lib COPE va Kataloniyaning «Sport» nashri bilan hamkorlik qiladigan ispaniyalik jurnalist hamda strimer Siro Lopes o‘z YouTube-kanalida ma’lum qildi.

«Ular o‘rtasida ketayotgan hokimiyat uchun kurashda — aniqrog‘i, Florentinoning Laporta bilan emas, ko‘proq Laportaning Florentino bilan kurashida — bu imkoniyatni istisno qilib bo‘lmaydi. Ular futbolchini ko‘ndirishlari kerak, lekin aytishganidek, pul hamma narsani hal qiladi. Pedri borasida juda muhim omil bor: u «Barsa»da baxtli va u ushbu klubning haqiqiy muxlisi», — dedi Lopes.

Ushbu ma’lumotni «ElDesmarque» jurnalisti Roberto Gomes ham tasdiqladi.

«[Jurnalist] Xuan Gatodan olingan ma’lumotlarga ko‘ra, «Madrid» 2027/28 yilgi mavsum uchun sotib olmoqchi bo‘lgan o‘yinchi — bu Pedri. Bu faqatgina Figu bilan sodir bo‘lgan voqeaga qiyoslash mumkin bo‘lgan sensasiya bo‘ladi. Bu yerda gap nafaqat tarkibni kuchaytirish, balki «Barselona»dan eng muhim o‘yinchini tortib olish haqida ketmoqda», — dedi Gomes.

Eslatib o‘tamiz, Pedrining «ko‘k-anorranglilar» bilan shartnomasi 2030 yilgacha mo‘ljallangan, tovon puli esa 1 milliard yevroni tashkil etadi.