«Napoli» hujumkor yarim himoyachisi Antonio Vergara qishki transfer oynasida Angliyaga ko‘chib o‘tishi mumkin edi. Bu haqdagi ma’lumotni Italiyaning «Tuttosport» gazetasi tarqatdi.
Manba bergan xabarlarga ko‘ra, yanvar oyida Londonning «Tottenxem» klubi 23 yoshli italiyalik futbolchini sotib olishga harakat qilgan. «Shporlar» yosh yulduz uchun 20 million yevro taklif qilishgan, biroq neapolliklardan rad javobini olishgan. Hozircha klub rejalaridan futbolchi bilan xayrlashish o‘rin olmagan.
Joriy mavsumda Vergara barcha turnirlarni inobatga olgan holda 12 ta o‘yinda ishtirok etdi, ikkita gol urdi va o‘z hisobiga ikkita golli uzatmani yozdirib qo‘ydi.
«Transfermarkt» portali ma’lumotlariga ko‘ra, yarim himoyachining bozor qiymati 2,5 million yevroni tashkil etadi.
