«Наполи» ҳужумкор ярим ҳимоячиси Антонио Вергара қишки трансфер ойнасида Англияга кўчиб ўтиши мумкин эди. Бу ҳақдаги маълумотни Италиянинг «Tuttosport» газетаси тарқатди.

Манба берган хабарларга кўра, январь ойида Лондоннинг «Тоттенхэм» клуби 23 ёшли италиялик футболчини сотиб олишга ҳаракат қилган. «Шпорлар» ёш юлдуз учун 20 миллион евро таклиф қилишган, бироқ неаполликлардан рад жавобини олишган. Ҳозирча клуб режаларидан футболчи билан хайрлашиш ўрин олмаган.

Жорий мавсумда Вергара барча турнирларни инобатга олган ҳолда 12 та ўйинда иштирок этди, иккита гол урди ва ўз ҳисобига иккита голли узатмани ёздириб қўйди.

«Transfermarkt» портали маълумотларига кўра, ярим ҳимоячининг бозор қиймати 2,5 миллион еврони ташкил этади.