"Yuventus" klubi Yevropaning eng yaxshi jamoalari (jumladan, "Real Madrid") qiziqish bildirgan turk iqtidori Kenan Yildiz bilan kelishuvni rasman uzaytirdi. Shartnoma imzolangani e’lon qilinganidan so‘ng, Yildiz o‘z tuyg‘ulari bilan o‘rtoqlashdi va klub rahbariyatiga minnatdorchilik bildirdi.

"Birinchi navbatda Jon Elkannga minnatdorchilik bildirmoqchiman. Men juda xursandman, "Yuventus"da o‘zimni uydagidek his qilyapman, atrofimdagilar xuddi o‘z oilamdek. Ishonchim komilki, yaqin kelajakda bizni katta muvaffaqiyatlar kutmoqda", — deya Yildizning so‘zlaridan iqtibos keltiradi "derbyderbyderby.it".

Eslatib o‘tamiz, hozirda Turin klubi A Seriya turnir jadvalida 23 turdan so‘ng 45 ochko bilan to‘rtinchi o‘rinni egallab turibdi.