Portugaliyalik mutaxassis Paulu Fonseka o‘zining yangi klubi — "Lion"da o‘z o‘rnini topdi. U jamoa boshqaruvini qo‘lga olganidan beri o‘tkazilgan 51 ta o‘yinning 34 tasida g‘alaba qozondi. Bu har uchta o‘yindan ikkitasi yoki roppa-rosa 66,6 foiz demakdir.
Bu klub butun tarixidagi eng yaxshi ko‘rsatkichdir. Ikkinchi o‘rinni 108 ta o‘yinda 69 ta g‘alaba qayd etgan Jerar Ulye egallab turibdi (63,9%). Uchinchi o‘rinda esa 55 ta o‘yindan 35 tasida g‘alabaga erishgan Alen Perren bor — 63,6 foiz.
Hozirda "Lion" Fransiya chempionati turnir jadvalida uchinchi o‘ringa ko‘tarilib oldi. Navbatdagi turda Paulu Fonseka shogirdlari o‘z maydonlarida "Nissa"ni qabul qilishadi.
