«Manchester Siti» markaziy himoyachisi Mark Gexi Premyer-liga doirasida «Liverpul»ga qarshi kechgan bahsda «Enfild» stadionida hushtaklar ostida qoldi.
25 yoshli futbolchi «shaharliklar»ning «qizillar» ustidan 2:1 hisobida g‘alaba qozonishiga yordam berdi.
«Rostini aytsam, nima uchun hushtak chalishganini bilmayman, lekin men buni nazorat qila olmayman. Men shunchaki o‘yin davomida meni qo‘llab-quvvatlab turgan muxlislarimizdan minnatdorman», — dedi Gexi o‘z klubi matbuot xizmati tomonidan keltirilgan intervyusida.
Mark Gexi yanvar oyida «Kristal Pelas»dan «Manchester Siti»ga ko‘chib o‘tgan edi. Mavsum boshida ingliz futbolchisi «Liverpul»ga o‘tishiga bir baxya qolgandi — o‘shanda kelishuv so‘nggi pallada bekor bo‘lgan.
