Myunxenning «Bavariya» klubi hujumchisi Garri Keyn «Xoffenxaym» ustidan qozonilgan g‘alabadan so‘ng o‘z fikrlarini bildirdi. Bundesliganing 8 fevral kuni bo‘lib o‘tgan 21-tur uchrashuvi 5:1 hisobida yakunlandi.

«Shubhasiz, so‘nggi paytlarda qator muvaffaqiyatsiz natijalar tufayli jamoada biroz xavotir bor edi. Biz uchun xotirjamlikni saqlash va o‘z o‘yin uslubimizga sodiq qolish o‘ta muhim edi. Tayyorgarlik uchun bizda butun boshli hafta bor edi va biz juda intensiv mashg‘ulotlar o‘tkazdik», — dedi Keyn klub saytiga bergan intervyusida.

«Ko‘rinib turibdiki, jamoa yaxshi holatda — barcha o‘yinchilar ajoyib jismoniy formada va maydonga tushishga intilishmoqda. Buni, ayniqsa, o‘yin boshida ko‘rish mumkin edi. Keyin raqib jamoa o‘yinchisi chetlatildi, bu esa ritmimizni biroz buzdi. O‘zimizga kelib olishimiz uchun taxminan 15-20 daqiqa vaqt kerak bo‘ldi. «Xoffenxaym»ga ham tan berish kerak — bu kuchli jamoa va ularning futbolchilari yaxshi o‘yin namoyish etishadi».

«Bavariya» 54 ochko bilan chempionatda peshqadamlik qilmoqda. Dortmundning «Borussiya» klubida 48 ochko bor. Keyn 24 ta gol bilan to‘purarlar poygasida yetakchilik qilmoqda.