Myunxendagi jamoat transporti xodimlarining ish tashlashiga qaramay, «Bavariya» va «RB Leypsig» o‘rtasidagi Germaniya Kubogi uchrashuvi belgilangan vaqtda bo‘lib o‘tadi. «Bild» nashrining xabar berishicha, chorshanba, 11 fevral kuniga rejalashtirilgan chorak final bahsi qoldirilmaydi. Yakshanba, 8 fevral kuni ish tashlash sababli o‘yin boshqa muddatga ko‘chirilishi mumkinligi haqida xabarlar tarqalgan edi.
Ish tashlash Myunxen hududidagi barcha metro yo‘nalishlariga ta’sir qiladi, bu esa stadionga tashrif buyurmoqchi bo‘lgan muxlislar uchun qiyinchiliklar tug‘diradi. Biroq Myunxen klubi ishqibozlarning o‘yin o‘tkaziladigan joyga xavfsiz va qulay yetib borishlarini ta’minlash maqsadida maxsus transport tashkil etilishini ma’lum qildi.
