"Liverpul" ustozi Arne Slot o‘tgan yozda "Bavariya"ga sotilgan vinger Luis Dias haqidagi savolga javob berdi.

"Qizillar" kolumbiyalik futbolchining sotuvidan 70 million yevro ishlab olishdi. Germaniyada Dias darhol o‘z mahoratini namoyish etdi va Myunxen grandining asosiy o‘yinchilaridan biriga aylandi.

"Yaxshi futbolchilarning ketishi doim seziladi. Dias o‘tgan mavsumda muhim rol o‘ynagan edi, lekin u yagona muhim o‘yinchi emasdi — boshqalar ham natijaga ta’sir ko‘rsatishgan. Diasning sotilishi misolida biz "Liverpul" qanday boshqarilishini ko‘rishimiz mumkin: 28 yoshli futbolchi uchun bunday taklif tushganida, klub barqaror rivojlanish tamoyillariga amal qilib, u bilan xayrlashishga qaror qildi. Biz APLda, ayniqsa top-klublar orasida qoidadan istisnomiz. Oxirgi yillarda ushbu model bizga muvaffaqiyat keltirayotgani juda yoqimli. Hozir Luis Diasning "Bavariya"dagi ishlari joyida va bu meni hayron qoldirmaydi", — deya Slotning so‘zlarini "Bayern & Germany" nashri keltirmoqda.

Dias "Bavariya" safida 30 ta uchrashuvda 18 ta gol va 14 ta golli uzatmaga mualliflik qildi.