«Liverpul» bosh murabbiyi Arne Slot Muhammad Salohning navbatdagi tarixiy yutug‘i haqidagi fikrlari bilan o‘rtoqlashdi.

33 yoshli futbolchi «Sanderlend»ga qarshi bahsda (1:0) golli uzatmani amalga oshirib, Premyer-liga doirasida «qizillar» safida assist berish bo‘yicha Stiven Jerrardga yetib oldi. Endilikda misrlik hujumchi ushbu ko‘rsatkich bo‘yicha klub rekordini afsonaviy sobiq yarim himoyachi bilan bo‘lishib turibdi.

«Salohning «Liverpul»da rekordlari juda ko‘p va bu safar u shunday buyuk o‘yinchi bilan tenglashib oldi. Muhammad ham, Jerrard kabi klub uchun nihoyatda muhim ahamiyatga ega. Stiven meni kechirsin-u, lekin Saloh uning rekordini yangilashiga umid qilaman», — dedi Slot o‘yindan keyingi intervyusida.

Muhammad Saloh 2017 yildan buyon «Liverpul» sharafini himoya qilib kelmoqda, Stiven Jerrard esa undan ikki yil oldin jamoani tark etgan edi.