«Ливерпуль» бош мураббийи Арне Слот Муҳаммад Салоҳнинг навбатдаги тарихий ютуғи ҳақидаги фикрлари билан ўртоқлашди.

33 ёшли футболчи «Сандерленд»га қарши баҳсда (1:0) голли узатмани амалга ошириб, Премьер-лига доирасида «қизиллар» сафида ассист бериш бўйича Стивен Жеррардга етиб олди. Эндиликда мисрлик ҳужумчи ушбу кўрсаткич бўйича клуб рекордини афсонавий собиқ ярим ҳимоячи билан бўлишиб турибди.

«Салоҳнинг «Ливерпуль»да рекордлари жуда кўп ва бу сафар у шундай буюк ўйинчи билан тенглашиб олди. Муҳаммад ҳам, Жеррард каби клуб учун ниҳоятда муҳим аҳамиятга эга. Стивен мени кечирсин-у, лекин Салоҳ унинг рекордини янгилашига умид қиламан», — деди Слот ўйиндан кейинги интервьюсида.

Муҳаммад Салоҳ 2017 йилдан буён «Ливерпуль» шарафини ҳимоя қилиб келмоқда, Стивен Жеррард эса ундан икки йил олдин жамоани тарк этган эди.