«Bavariya» Germaniya Kubogi chorak finalida «RB Leypsig»ni mag‘lub etib (2:0), trebl sari navbatdagi qadamni tashladi.

Myunxen grandiga yarim final yo‘llanmasini Xarri Keyn va Luis Dias tomonidan kiritilgan gollar taqdim etdi. Uchrashuv yakunlangach, jurnalistlar «Bavariya» sport direktori Maks Eberldan joriy mavsumda treblni qo‘lga kiritish istiqbollari haqida so‘rashdi.

«Biz har uchtala turnirda ham kurashni davom ettirmoqdamiz. Oldinda bizni o‘zimiz istagandek voqealarga boy mart oyi kutmoqda: Chempionlar ligasi 1/8 finali va Germaniya Kubogi yarim finali. Biz natijadan mamnunmiz, ammo barcha musobaqalarda g‘alaba qozonish uchun maqsad sari qadamma-qadam borishimiz kerak. Agar doimo oldinga qarab yugursangiz, qoqilib ketishingiz mumkin», — deya Eberlning so‘zlarini keltirmoqda «Bayern & Germany».

Bundesligada Vensan Kompani jamoasi Dortmundning «Borussiya» klubini olti ochkoga ortda qoldirgan holda birinchi o‘rinni egallab turibdi.