«Бавария» Германия Кубоги чорак финалида «РБ Лейпциг»ни мағлуб этиб (2:0), требл сари навбатдаги қадамни ташлади.

Мюнхен грандига ярим финал йўлланмасини Харри Кейн ва Луис Диас томонидан киритилган голлар тақдим этди. Учрашув якунлангач, журналистлар «Бавария» спорт директори Макс Эберлдан жорий мавсумда треблни қўлга киритиш истиқболлари ҳақида сўрашди.

«Биз ҳар учтала турнирда ҳам курашни давом эттирмоқдамиз. Олдинда бизни ўзимиз истагандек воқеаларга бой март ойи кутмоқда: Чемпионлар лигаси 1/8 финали ва Германия Кубоги ярим финали. Биз натижадан мамнунмиз, аммо барча мусобақаларда ғалаба қозониш учун мақсад сари қадамма-қадам боришимиз керак. Агар доимо олдинга қараб югурсангиз, қоқилиб кетишингиз мумкин», — дея Эберлнинг сўзларини келтирмоқда «Bayern & Germany».

Бундеслигада Венсан Компани жамоаси Дортмунднинг «Боруссия» клубини олти очкога ортда қолдирган ҳолда биринчи ўринни эгаллаб турибди.