"Barselona" futbol klubi Ispaniya Kubogi dastlabki yarim finalida Madridning "Atletiko" jamoasiga qarshi o‘yinda himoyachi Pau Kubarsining bekor qilingan goli sababli Ispaniya Qirollik futbol federasiyasiga (RFEF) rasmiy shikoyat yo‘llash niyatida.
Qayd etilishicha, Kataloniya klubi rahbariyati hakamlarning qaroridan ham, ushbu qarorni qabul qilish jarayonidan ham nihoyatda norozi. Tegishli murojaat yaqin vaqt ichida federasiyaga yuborilishi kutilmoqda.
Mashmashaga sabab bo‘lgan vaziyat Ispaniya Kubogi yarim finalining birinchi o‘yinida sodir bo‘ldi. Unda "Atletiko" o‘z maydonida "Barselona"ni 4:0 hisobida mag‘lubiyatga uchratgan edi. Madridda o‘tgan bahsda hisob 7-daqiqadayoq mehmonlar himoyachisi Erik Garsiyaning avtogolidan so‘ng ochildi. 14-daqiqada Antuan Grizmann mezbonlar ustunligini oshirgan bo‘lsa, birinchi bo‘lim o‘rtalariga kelib "Atletiko" Ademola Lukman (33-daqiqa) va Xulian Alvaresning (45+2-daqiqa) gollari evaziga hisobni yirik ko‘rinishga olib keldi.
Ikkinchi bo‘limda hisob o‘zgarmadi, biroq 86-daqiqada "Barselona" 1 kishi kam bo‘lib qoldi — Erik Garsiya qizil kartochka oldi. Kataloniyaliklarning gollaridan biri hakamlar brigadasining aralashuvidan so‘ng bekor qilindi va aynan shu holat rasmiy shikoyat tayyorlanishiga sabab bo‘ldi.
Ispaniya Kubogi yarim finalining javob uchrashuvi 3 martdan 4 martga o‘tar kechasi Barselonadagi "Spotify Kamp Nou" stadionida bo‘lib o‘tadi. Eslatib o‘tamiz, "Barselona" Ispaniya Kubogining amaldagi sohibi hisoblanadi.
