"Барселона" футбол клуби Испания Кубоги дастлабки ярим финалида Мадриднинг "Атлетико" жамоасига қарши ўйинда ҳимоячи Пау Кубарсининг бекор қилинган голи сабабли Испания Қироллик футбол федерациясига (RFEF) расмий шикоят йўллаш ниятида.

Қайд этилишича, Каталония клуби раҳбарияти ҳакамларнинг қароридан ҳам, ушбу қарорни қабул қилиш жараёнидан ҳам ниҳоятда норози. Тегишли мурожаат яқин вақт ичида федерацияга юборилиши кутилмоқда.

Машмашага сабаб бўлган вазият Испания Кубоги ярим финалининг биринчи ўйинида содир бўлди. Унда "Атлетико" ўз майдонида "Барселона"ни 4:0 ҳисобида мағлубиятга учратган эди. Мадридда ўтган баҳсда ҳисоб 7-дақиқадаёқ меҳмонлар ҳимоячиси Эрик Гарсиянинг автоголидан сўнг очилди. 14-дақиқада Антуан Гризманн мезбонлар устунлигини оширган бўлса, биринчи бўлим ўрталарига келиб "Атлетико" Адемола Лукман (33-дақиқа) ва Хулиан Альвареснинг (45+2-дақиқа) голлари эвазига ҳисобни йирик кўринишга олиб келди.

Иккинчи бўлимда ҳисоб ўзгармади, бироқ 86-дақиқада "Барселона" 1 киши кам бўлиб қолди — Эрик Гарсия қизил карточка олди. Каталонияликларнинг голларидан бири ҳакамлар бригадасининг аралашувидан сўнг бекор қилинди ва айнан шу ҳолат расмий шикоят тайёрланишига сабаб бўлди.

Испания Кубоги ярим финалининг жавоб учрашуви 3 мартдан 4 мартга ўтар кечаси Барселонадаги "Spotify Камп Ноу" стадионида бўлиб ўтади. Эслатиб ўтамиз, "Барселона" Испания Кубогининг амалдаги соҳиби ҳисобланади.