"Brentford" hujumchisi Igor Tyago bolaligida Angliya Premyer-ligasi o‘yinlarini qanday tomosha qilgani haqida so‘zlab berdi.
24 yoshli futbolchi ajoyib mavsumni o‘tkazmoqda: u Angliya chempionati to‘purarlar poygasida 26 o‘yinda 17 ta gol bilan ikkinchi o‘rinni egallab turibdi.
"Boshida futbolga unchalik qiziqmasdim, lekin keyin akam meni har hafta APL o‘yinlarini, ayniqsa, "Manchester Yunayted" ishtirokidagi bahslarni tomosha qilishga majbur qilgan. Vaqt o‘tishi bilan men bu jamoaga bog‘lanib qoldim va uni yaxshi ko‘rib qoldim", — deya braziliyalik forvardning so‘zlarini keltiradi Transfer News Live.
Igor Tyago Angliyaga 2024 yilning yozida ko‘chib o‘tgan edi: "Brentford" uni Belgiyaning "Bryugge" klubidan 33 mln yevroga sotib olgan.













