O‘ng qanot himoyasida Diogu Dalot va Nussair Mazraui kabi futbolchilarga ega bo‘lgan "Manchester Yunayted" ushbu pozisiya uchun faol ravishda kuchaytirish izlamoqda. Bu haqda "TEAMtalk" xabar bermoqda.

Manbaning ma’lumotiga ko‘ra, Dalot APLning joriy mavsumida 21 ta o‘yinda asosiy tarkibda maydonga tushgan bo‘lsa-da, uning "Old Trafford"dagi uzoq muddatli kelajagi noma’lumligicha qolmoqda. Birinchidan, Madridning "Real" klubi hamon Dalotni sotib olishga qiziqish bildirmoqda. Ikkinchidan, klub rahbariyati Diogu bilan yangi kelishuv imzolash maoshning sezilarli darajada oshirilishini talab qilishini biladi.

"MYU" skautlarida Yulian Ryuersonning so‘nggi o‘yinlardagi harakatlari katta taassurot qoldirdi. Dortmundning "Borussiya" klubi yulduzi shunchaki o‘ng qanot himoyachisi emas, u butun qanot bo‘ylab harakat qila oladi va vinger sifatida ham o‘ynashi mumkin. Norvegiya terma jamoasining 28 yoshli futbolchisi klub bilan 2028 yilgacha shartnomaga ega va u 40 million yevrodan kam bo‘lmagan summaga jamoani tark etishi mumkin. Joriy mavsumda futbolchi barcha musobaqalardagi 29 ta o‘yinda 13 ta golli uzatmani amalga oshirdi.