Aleksandr Zinchenko «Ayaks»ning asosiy tarkibidagi ilk o‘yinidayoq jiddiy jarohat oldi.
Himoyachi «Arsenal»dan ketganidan so‘ng, 1 fevral kuni Niderlandiya klubiga kelib qo‘shilgan edi. Ukrainalik futbolchi Eredivizi doirasida shanba kuni «Fortuna Sittard»ga qarshi kechgan bahsda (4:1) shikastlandi. O‘yinning 6-daqiqasidayoq maydonni oqsoqlangan holda tark etdi.
Uchrashuv yakunlangach, «Ayaks» bosh murabbiyi Fred Grim futbolchi uzoq muddatga safdan chiqqan bo‘lishi mumkinligidan xavotir bildirdi.
«U bizga juda yaxshi niyatlar bilan kelgandi va o‘zini darrov ko‘rsata boshladi. U biz qidirgan yetakchi edi. Bu jarohat biz uchun haqiqiy zarba bo‘ldi. Uning qattiq og‘riq sezayotganini ko‘rdim. Endi faqat kutish qoldi. Umid qilamanki, dushanba kuni batafsil ma’lumotga ega bo‘lamiz», — dedi Grim ESPN nashriga bergan intervyusida.
Zinchenko «Ayaks» safida o‘zining ikkinchi o‘yinini o‘tkazayotgan edi: AZga qarshi kechgan debyut bahsida u zaxiradan maydonga tushib, 14 daqiqa o‘ynagandi.
