Александр Зинченко «Аякс»нинг асосий таркибидаги илк ўйинидаёқ жиддий жароҳат олди.

Ҳимоячи «Арсенал»дан кетганидан сўнг, 1 февраль куни Нидерландия клубига келиб қўшилган эди. Украиналик футболчи Эредивизи доирасида шанба куни «Фортуна Ситтард»га қарши кечган баҳсда (4:1) шикастланди. Ўйиннинг 6-дақиқасидаёқ майдонни оқсоқланган ҳолда тарк этди.

Учрашув якунлангач, «Аякс» бош мураббийи Фред Грим футболчи узоқ муддатга сафдан чиққан бўлиши мумкинлигидан хавотир билдирди.

«У бизга жуда яхши ниятлар билан келганди ва ўзини дарров кўрсата бошлади. У биз қидирган етакчи эди. Бу жароҳат биз учун ҳақиқий зарба бўлди. Унинг қаттиқ оғриқ сезаётганини кўрдим. Энди фақат кутиш қолди. Умид қиламанки, душанба куни батафсил маълумотга эга бўламиз», — деди Грим ESPN нашрига берган интервьюсида.

Зинченко «Аякс» сафида ўзининг иккинчи ўйинини ўтказаётган эди: АЗга қарши кечган дебют баҳсида у захирадан майдонга тушиб, 14 дақиқа ўйнаганди.