«Yuventus» «Bornmut» markaziy himoyachisi Markos Senesi bilan shartnoma imzolash ustida ishlashda davom etmoqda.

Argentinalik futbolchi «giloslar» bilan muddati tugab borayotgan shartnomani uzaytirmaslikka qaror qildi, shu sababli joriy mavsum yakunlanganidan keyin u erkin agentga aylanadi. Jurnalist Nikolo Skiraning xabar berishicha, yaqinda «keksa sinyora» vakillari 28 yoshli o‘yinchining agentlari bilan ehtimoliy transfer shartlarini muhokama qilish uchun uchrashishgan. Turinliklar Senesiga yiliga 3 mln yevro maosh bilan to‘rt yillik shartnoma taklif qilishga tayyor.

Vaziyatni, shuningdek, «Barselona», «Atletiko», «Manchester Yunayted» va yana bir nechta nomi oshkor etilmagan Angliya klublari kuzatib borishmoqda. Dortmundning «Borussiya» klubi esa Senesiga «Yuventus»nikidan ham manfaatliroq shartlar taklif qilgan, biroq futbolchi hozircha bunga rozilik javobini bergani yo‘q.