«Ювентус» «Борнмут» марказий ҳимоячиси Маркос Сенеси билан шартнома имзолаш устида ишлашда давом этмоқда.

Аргентиналик футболчи «гилослар» билан муддати тугаб бораётган шартномани узайтирмасликка қарор қилди, шу сабабли жорий мавсум якунланганидан кейин у эркин агентга айланади. Журналист Николо Скиранинг хабар беришича, яқинда «кекса синьора» вакиллари 28 ёшли ўйинчининг агентлари билан эҳтимолий трансфер шартларини муҳокама қилиш учун учрашишган. Туринликлар Сенесига йилига 3 млн евро маош билан тўрт йиллик шартнома таклиф қилишга тайёр.

Вазиятни, шунингдек, «Барселона», «Атлетико», «Манчестер Юнайтед» ва яна бир нечта номи ошкор этилмаган Англия клублари кузатиб боришмоқда. Дортмунднинг «Боруссия» клуби эса Сенесига «Ювентус»никидан ҳам манфаатлироқ шартлар таклиф қилган, бироқ футболчи ҳозирча бунга розилик жавобини бергани йўқ.