Londonning «Arsenal» klubi Bilbaoning «Atletik» jamoasi vingeri Niko Uilyamsga qiziqish bildirmoqda. TEAMTalk nashri bergan ma’lumotlarga ko‘ra, 23 yoshli futbolchi o‘z klubidagi hozirgi holatidan mamnun emas va jamoani tark etish imkoniyatlarini ko‘rib chiqmoqda.

«Arsenal» allaqachon Uilyamsning vakillari bilan bog‘langan va yozgi transfer oynasi oldidan rasmiy taklif tayyorlash niyatida. «Atletik» rahbariyati ham futbolchining ketishi muqarrar ekanini tushunib turibdi, chunki Niko jamoada o‘zini qulay his qilmayapti va o‘sish uchun boshqa klubga o‘tish kerakligini anglab yetgan.

Basklar o‘z yulduzini qo‘yib yuborishga tayyor, biroq buning uchun kamida 100 million yevro talab qilishmoqda. Manbalarga ko‘ra, bunday yuqori narx «Arsenal»ni fikridan qaytara olmaydi.

Joriy mavsumda Uilyams «Atletik» safida 26 ta o‘yinda maydonga tushib, 4 ta gol urdi va 6 ta golli uzatmani amalga oshirdi. Hozirda uning jamoasi La Ligada 28 ochko bilan 10-o‘rinda bormoqda.