«Manchester Yunayted» rahbariyati yozgi transfer oynasi uchun asosiy strategiyani belgilab oldi. Klub endilikda ingliz Premyer-ligasida o‘zini ko‘rsata olgan futbolchilarni sotib olishga urg‘u beradi.
The Touchline nashrining ijtimoiy tarmoqlardagi xabariga ko‘ra, «Yunayted» mutasaddilari Brayan Mbemo va Mateus Kunya transferlarini muvaffaqiyatli misol sifatida ko‘rishmoqda. Ushbu hujumchilar «Brentford» va «Vulverxempton»dagi samarali o‘yinlaridan so‘ng mankunianliklar safiga kelib qo‘shilgan edi.
Ma’lumot uchun:
Brayan Mbemo 2025 yil 21 iyulda «MYU» a’zosiga aylangan.
Mateus Kunya esa 2025 yil 12 iyunda £ 62,5 mln (€ 74 mln) evaziga transfer qilingan.
Ayni damda APLning 26 turidan so‘ng Maykl Kerrik shogirdlari 45 ochko bilan 4-o‘rinni egallab turibdi. Jamoa navbatdagi uchrashuvini 23 fevral kuni safarda «Everton»ga qarshi o‘tkazadi.
