La Liganing 24-turidan o‘rin olgan «Jirona» va «Barselona» (2:1) uchrashuvidagi mashmashali vaziyat sababli VAR hakami jazolanadigan bo‘ldi.

O‘yinning 86-daqiqasida Fran Beltran tomonidan kiritilgan goldan avval «Jirona» yarim himoyachisi Klaudio Echeverri to‘pni o‘ziga bo‘ysundirayotgan vaqtda «Barsa» himoyachisi Jyul Kundening oyog‘ini bosib olgan. Fransuz himoyachisi maydonga yiqilgan, Echeverri esa hujumni davom ettirib, Xoel Rokaga pas bergan, u esa Beltranga golli uzatmani yetkazgan.

VAR hakamlari vaziyatni ko‘rib chiqishgan bo‘lsa-da, bosh hakam Sesar Soto Gradoni monitor yoniga chaqirishmagan. Natijada gol inobatga olingan va bu «Jirona»ga g‘alaba keltirgan.

"As" nashrining xabariga ko‘ra, La Liga Hakamlar texnik qo‘mitasi (CTA) Echeverrining harakatini qoida buzilishi deb topdi. Demak, VAR vaziyatga aralashishi va Beltranning goli bekor qilinishi kerak edi.

Ushbu bahsda VAR uchun mas’ul bo‘lgan hakam David Galves Raskon noma’lum vaqtga o‘z vazifasidan chetlatildi.