Ла Лиганинг 24-туридан ўрин олган «Жирона» ва «Барселона» (2:1) учрашувидаги машмашали вазият сабабли VAR ҳаками жазоланадиган бўлди.

Ўйиннинг 86-дақиқасида Фран Бельтран томонидан киритилган голдан аввал «Жирона» ярим ҳимоячиси Клаудио Эчеверри тўпни ўзига бўйсундираётган вақтда «Барса» ҳимоячиси Жюль Кунденинг оёғини босиб олган. Француз ҳимоячиси майдонга йиқилган, Эчеверри эса ҳужумни давом эттириб, Хоэль Рокага пас берган, у эса Бельтранга голли узатмани етказган.

VAR ҳакамлари вазиятни кўриб чиқишган бўлса-да, бош ҳакам Сесар Сото Градони монитор ёнига чақиришмаган. Натижада гол инобатга олинган ва бу «Жирона»га ғалаба келтирган.

"As" нашрининг хабарига кўра, Ла Лига Ҳакамлар техник қўмитаси (CTA) Эчеверрининг ҳаракатини қоида бузилиши деб топди. Демак, VAR вазиятга аралашиши ва Бельтраннинг голи бекор қилиниши керак эди.

Ушбу баҳсда VAR учун масъул бўлган ҳакам Давид Гальвес Раскон номаълум вақтга ўз вазифасидан четлатилди.