"Pari Sen-Jermen" yarim himoyachisi Vitinya Chempionlar ligasi doirasidagi "Monako"ga qarshi o‘yindan (3:2) so‘ng jurnalistlar bilan suhbatlashdi.
Monegasklar tezkorlik bilan ikkita gol urishdi – Folarin Balogun 18-daqiqadayoq dubl qayd etdi. Mehmonlar tanaffusgacha Dezire Due va Ashraf Hakimiyning harakatlari bilan hisobni tenglashtirishga ulgurishdi, ikkinchi bo‘limda esa o‘sha Due yana bitta gol urib, parijliklarga g‘alaba keltirdi.
"Bu shunchaki fantastika. Biz ikkita tezkor gol o‘tkazib yubordik, juda qiyin bo‘ldi, lekin xarakter ko‘rsatib, vaziyatni o‘nglay oldik. Due va zaxiradan tushgan boshqa yigitlar bizga juda katta yordam berishdi. Dezire shunchaki fenomenal. Bizda to‘g‘ri ruhiyat bor edi, ikkita gol o‘tkazgandan keyin ajoyib o‘yin ko‘rsatdik. Javob o‘yiniga hisob 0:0 degandek yondashishimiz kerak. Bor kuchimizni beramiz va yana g‘alaba qozonishga harakat qilamiz", – deya UYEFA Vitinyaning so‘zlaridan iqtibos keltirmoqda.
Javob o‘yini kelasi chorshanba kuni Parijda bo‘lib o‘tadi.
