"Manchester Siti" himoyachisi Abduqodir Husanov ham joriy, ham keyingi mavsumda "shaharliklar" uchun muhim rol o‘ynaydi. Pep Gvardiola jamoasi faoliyatini yoritib boruvchi jurnalist Saymon Bajkovski shunday fikr bildirdi.
"Mark Gexi kelganidan keyin Husanovning istiqbollari qanday? Niko Gonsales — "Siti"da Husanovga qaraganda asosiy tarkibda ko‘proq ketma-ket o‘yin o‘tkazgan yagona futbolchi, shuning uchun ishonch bilan aytish mumkinki, keyingi mavsumda u yetarlicha o‘yin amaliyotiga ega bo‘ladi.
Gexi, Ruben Diash va jarohatidan qaytganidan so‘ng Yoshko Gvardiol ham shunchalik muhim bo‘ladi. Bundan tashqari, "Siti"ga yana bir ishonchli himoyachi kerak. Zamonaviy futbolda jamoada beshta kuchli markaziy himoyachi bo‘lishi lozim — xuddi "Siti" trebl qayd etgan vaqtdagi kabi", — deya jurnalistning so‘zlarini "Manchester Evening News" keltirmoqda.
Husanov 2025 yilning yanvaridan beri "Manchester Siti" tarkibida harakat qilmoqda. Joriy mavsumda 21 yoshli markaziy himoyachi barcha musobaqalarda 22 ta o‘yinda qatnashdi.
