"Манчестер Сити" ҳимоячиси Абдуқодир Ҳусанов ҳам жорий, ҳам кейинги мавсумда "шаҳарликлар" учун муҳим роль ўйнайди. Пеп Гвардиола жамоаси фаолиятини ёритиб борувчи журналист Саймон Бажковски шундай фикр билдирди.

"Марк Гехи келганидан кейин Ҳусановнинг истиқболлари қандай? Нико Гонсалес — "Сити"да Ҳусановга қараганда асосий таркибда кўпроқ кетма-кет ўйин ўтказган ягона футболчи, шунинг учун ишонч билан айтиш мумкинки, кейинги мавсумда у етарлича ўйин амалиётига эга бўлади.

Гехи, Рубен Диаш ва жароҳатидан қайтганидан сўнг Йошко Гвардиол ҳам шунчалик муҳим бўлади. Бундан ташқари, "Сити"га яна бир ишончли ҳимоячи керак. Замонавий футболда жамоада бешта кучли марказий ҳимоячи бўлиши лозим — худди "Сити" требл қайд этган вақтдаги каби", — дея журналистнинг сўзларини "Manchester Evening News" келтирмоқда.

Ҳусанов 2025 йилнинг январидан бери "Манчестер Сити" таркибида ҳаракат қилмоқда. Жорий мавсумда 21 ёшли марказий ҳимоячи барча мусобақаларда 22 та ўйинда қатнашди.