A Seriyaning 25-turidan o‘rin olgan bahsda «Milan» va «Komo» ochkolarni bo‘lishib olishdi (1:1). Mehmonlar 32-daqiqada Nikolas Pasning harakatlari bilan hisobni ochishgan bo‘lsa, «rossonerilar» tarkibida 64-daqiqada Rafael Leau javob qaytardi.
Uchrashuv yakunlangach, «Komo» ustozi Sesk Fabregas raqib yarim himoyachisi Luka Modrichning o‘yini haqida to‘xtalib o‘tdi.
«Modrichni tomosha qilish zavq bag‘ishlaydi. Men uni olqishladim. 41 yoshda bunday darajada to‘p surish... Biz unga bosim o‘tkazishga harakat qildik, lekin unga baribir! Uning A Seriyada ekanligi va biz uning o‘yinidan bahramand bo‘layotganimiz uchun unga rahmat aytishimiz kerak», — dedi DAZN nashriga bergan intervyusida ispaniyalik murabbiy. Ma’lumot uchun, Fabregasning o‘zi atigi 38 yoshda.
«Milan» 54 ochko bilan A Seriya jadvalida ikkinchi o‘rinni egallab turibdi, «Komo» esa 42 ochko bilan oltinchi pog‘onadan joy olgan.
