«Barselona» prezidenti Joan Laporta Ispaniya futbolidagi hakamlik mavzusida ochiqchasiga fikr bildirdi.

«Biz yomon o‘yin ko‘rsatsak, hakamlar bizni butunlay "yiqitishga" harakat qilishadi, boshqalarda [Madridning «Real» klubi nazarda tutilmoqda] muammo bo‘lsa — ularga yordam berishadi. «Real» futbolchilari suzishni a’lo darajada o‘rganib olishgan. Ular professionallarcha basseynga sho‘ng‘ishadi», — deya Laportaning so‘zlarini keltiradi Managing Barca.

«Barselona» oxirgi ikki o‘yinda mag‘lubiyatga uchradi: avval Ispaniya Kubogi yarim finalida Madridning «Atletiko»siga (0:4), so‘ngra La Ligada «Jirona»ga (1:2) imkoniyat boy berildi. Ikkala holatda ham hakamlik bilan bog‘liq mojarolar kuzatildi.

Yakshanba kuni Xans-Diter Flik shogirdlari «Levante» bilan kuch sinashadi.