O‘tmishning mashhur futbolchisi Jeymi Karrager «Arsenal» va «Vulverxempton» o‘rtasidagi yaqinda bo‘lib o‘tgan o‘yin natijasiga munosabat bildirdi. Angliya Premyer-ligasining qoldirilgan 31-turidan o‘rin olgan ushbu uchrashuv chorshanba kuni bo‘lib o‘tdi va 2:2 hisobidagi durang bilan yakunlandi.
«Men bu natijadan xursandman, chunki u o‘yinni yanada hayajonli qiladi, bizga muhokama uchun mavzu beradi va mavsum oxirigacha intrigani saqlab qoladi. Shu bois, bu Premyer-liga uchun foydali deb o‘ylayman», — deya ekspertning so‘zlarini keltirmoqda CBS Sports.
«Kanonirlar» Angliya chempionati turnir jadvalida peshqadamlikni davom ettirishmoqda, biroq «Manchester Siti» bilan oradagi farq endi unchalik katta emas — bor-yo‘g‘i besh ochko. Bundan tashqari, «shaharliklar»da bitta zaxira o‘yini ham mavjud.
