«Fenerbaxche» hujumchisi Anderson Taliska Yevropa Ligasi pley-off bosqichi doirasidagi «Nottingem Forest»ga qarshi birinchi o‘yin oldidan o‘z fikrlarini bildirdi.

«Ingliz klublariga qarshi o‘ynash doim qiyin. «Aston Villa» bilan bo‘lgan o‘yinda ham buni ko‘rgandik. Bo‘lajak bahs biz uchun o‘ziga xos ahamiyatga ega. Biz keyingi bosqichga chiqishni va musobaqaning hal qiluvchi pallalarigacha yetib borishni istaymiz», — deya braziliyalik futbolchining so‘zlarini keltiradi UYEFA rasmiy sayti.

Shuningdek, Taliska klubni muvaffaqiyatli transferlar va 2025 yil sentyabr oyida bosh murabbiy etib tayinlangan Domeniko Tedeskoni taklif qilgani uchun maqtadi.

«Yangi kelgan futbolchilar klubimizni yanada kuchli qilish uchun kelishdi. Bundan tashqari, bizda o‘z ishini a’lo darajada bajarayotgan ajoyib yosh murabbiy bor».

Joriy mavsumda 32 yoshli Taliska 35 ta o‘yinda maydonga tushib, 21 ta gol va 4 ta golli uzatmani amalga oshirishga muvaffaq bo‘ldi.