«Barselona» o‘z tarbiyalanuvchilarining shartnomasidagi tovon puli miqdorini ularning ma’lum bosqichlarga erishishiga qarab bosqichma-bosqich oshirib borishni rejalashtirmoqda. Bu haqda «Diario Sport» nashri xabar bermoqda.

Masalan, UYEFA Yoshlar ligasidagi debyut tovon puli miqdorini bazaviy 6 milliondan 8 million yevrogacha ko‘taradi. «Barsa Atletik» (o‘rinbosarlar jamoasi)ga kamida bir marta chaqirilgan futbolchilarning tovon puli esa 10 million yevrogacha oshiriladi.

«Barsa»ning ikkinchi jamoasi futbolchisi sifatida ro‘yxatdan o‘tib bo‘lgan 2008 yilda tug‘ilgan o‘yinchilar uchun esa 15 million yevrodan yuqori tovon puli belgilanadi.

Bunday o‘zgarishlarga shu qishda Dro Fernandesning «PSJ»ga o‘tib ketgani sabab bo‘ldi. Parij klubi yarim himoyachining shartnomasidagi 6 million yevrolik tovon pulini faollashtirgan edi, yakuniy transfer summasi esa «Barsa»ga to‘lanadigan kompensasiya bilan birga 8 million yevrodan sal ko‘proqni tashkil qildi.

Qayd etilishicha, agar Dro yangi shartlar asosida shartnoma imzolagan bo‘lganida va «Barselona»ning asosiy jamoasidagi 5 ta o‘yinini hisobga olganda, uning tovon puli 25 million yevroni tashkil etgan bo‘lardi.