«Барселона» ўз тарбияланувчиларининг шартномасидаги товон пули миқдорини уларнинг маълум босқичларга эришишига қараб босқичма-босқич ошириб боришни режалаштирмоқда. Бу ҳақда «Diario Sport» нашри хабар бермоқда.

Масалан, УЕФА Ёшлар лигасидаги дебют товон пули миқдорини базавий 6 миллиондан 8 миллион еврогача кўтаради. «Барса Атлетик» (ўринбосарлар жамоаси)га камида бир марта чақирилган футболчиларнинг товон пули эса 10 миллион еврогача оширилади.

«Барса»нинг иккинчи жамоаси футболчиси сифатида рўйхатдан ўтиб бўлган 2008 йилда туғилган ўйинчилар учун эса 15 миллион евродан юқори товон пули белгиланади.

Бундай ўзгаришларга шу қишда Дро Фернандеснинг «ПСЖ»га ўтиб кетгани сабаб бўлди. Париж клуби ярим ҳимоячининг шартномасидаги 6 миллион евролик товон пулини фаоллаштирган эди, якуний трансфер суммаси эса «Барса»га тўланадиган компенсация билан бирга 8 миллион евродан сал кўпроқни ташкил қилди.

Қайд этилишича, агар Дро янги шартлар асосида шартнома имзолаган бўлганида ва «Барселона»нинг асосий жамоасидаги 5 та ўйинини ҳисобга олганда, унинг товон пули 25 миллион еврони ташкил этган бўларди.