Londonning «Arsenal» klubi yarim himoyachisi Deklan Rays Premyer-liga doirasida «Tottenxem» jamoasiga qarshi bo‘lib o‘tadigan navbatdagi uchrashuv haqida fikr bildirdi.

«Kanonirlar» uchun safarda kechadigan «shporlar»ga qarshi bahs yakshanba kuni bo‘lib o‘tadi. O‘yin Toshkent vaqti bilan soat 21:30 da boshlanishi rejalashtirilgan.

«Shimoliy London derbisi — muvaffaqiyatsizliklardan so‘ng jamoaning nufuzini tiklash uchun qulay imkoniyatdir. Bu mavsumdagi eng muhim o‘yinlardan biri hisoblanadi. Bukayo Sakaning: «Bu yerda «Tottenxem»ga mag‘lub bo‘lishga haqqimiz yo‘q», degan so‘zlari yodimda. Bu nafaqat futbolchilar, balki muxlislar va klub xodimlari uchun ham amal qilinishi lozim bo‘lgan tamoyildir. Bu — boy berilishi mumkin bo‘lmagan bahs.

Gap nafaqat o‘yin darajasida, balki maydonda qanday kurashishing va g‘alabaga bo‘lgan ishtiyoqing qanchalik yuqori ekanligidadir. Biz ushbu qarama-qarshilikka to‘liq tayyormiz», — deya jurnalist Saymon Kollings Raysning so‘zlaridan iqtibos keltiradi.

Hozirgi vaqtda «Arsenal» turnir jadvalida peshqadamlikni davom ettirmoqda, «Tottenxem» esa 16-o‘rinni egallab turibdi.