Italiya chempionatida 26-tur bahslariga start berildi. Tur doirasida «Sassuolo» jamoasi musobaqa autsayderi hisoblangan «Verona» ustidan yirik hisobda g‘alaba qozondi. Mazkur uchrashuvda «neroverdi» faxriysi Domeniko Berardi o‘z hisobiga ikkita gol yozdirib qo‘ydi. Ushbu gollar evaziga u A Seriya tarixidagi umumiy to‘purarlar ro‘yxatida Andrey Shevchenkoni ortda qoldirishga muvaffaq bo‘ldi.

Ayni paytda Berardi hisobidagi gollar soni 128 taga yetdi, ukrainalik sobiq hujumchi hisobida esa 127 ta gol mavjud. Shu bilan birga, Berardi ushbu ko‘rsatkich bo‘yicha afsonaviy Janni Rivera bilan tenglashib oldi. Har ikki futbolchi A Seriya tarixidagi eng yaxshi to‘purarlarning umumiy reytingida 47-o‘rinni egallab turibdi.

Qayd etilgan g‘alaba «Sassuolo» jamoasiga turnir jadvalida sakkizinchi pog‘onaga ko‘tarilib olish imkonini berdi.